علامہ مفتی غلام اصغر صدیقی
پیغام
صدر، نظام المدارس پاکستان کی جانب سے
موجودہ دور میں جب دنیا—اور بالخصوص ہمارا معاشرہ—انتہا پسندی، فرقہ واریت، فکری انتشار اور عدم برداشت جیسے سنگین چیلنجز سے دوچار ہے، دینی تعلیم کی ذمہ داری پہلے سے کہیں زیادہ اہمیت اختیار کر گئی ہے۔ اس امر کی شدید ضرورت ہے کہ دینی مدارس ایسے علماء تیار کریں جو قرآن و سنت کے صحیح فہم کے ساتھ امن، محبت، اعتدال، رواداری، صبر و تحمل، اخوت اور قومی یکجہتی کے فروغ میں مؤثر کردار ادا کر سکیں۔ اسی مقصد کے پیشِ نظر نظام المدارس پاکستان نے اپنے قیام کے آغاز ہی سے ایک ایسے تعلیمی، تدریسی اور تربیتی نظام کی بنیاد رکھی ہے جو روایتی درسِ نظامی کی مضبوط علمی روایت کو محفوظ رکھتے ہوئے عصرِ حاضر کے علمی، فکری اور سماجی تقاضوں سے بھی ہم آہنگ ہے۔ ہمارے نزدیک دینی تعلیم کا مقصد محض دینی کتب کی تدریس نہیں بلکہ ایسے بااصول، صاحبِ بصیرت اور باصلاحیت علماء اور دینی قائدین تیار کرنا ہے جو اپنے زمانے کے تقاضوں کو سمجھتے ہوں اور معاشرے کی مثبت رہنمائی کی صلاحیت رکھتے ہوں۔ نظام المدارس پاکستان کے نصاب میں متعدد عصری علمی و فکری کتب شامل ہیں جو طلبہ میں تحقیقی رجحان، دعوتی شعور، فکری اعتدال، قائدانہ صلاحیتوں اور عصری مسائل کے فہم کو فروغ دیتی ہیں۔ مجددِ مائۃ حاضرہ شیخ الاسلام ڈاکٹر محمد طاہر القادری کے اصلاحی و تجدیدی وژن کی روشنی میں نظام المدارس پاکستان اپنی تمام تعلیمی سرگرمیوں میں اسلام کی حقیقی تعلیمات—امن و محبت، رواداری، اعتدال، صبر و تحمل، احترامِ انسانیت اور بین المسالک ہم آہنگی—کو بنیادی اہمیت دیتا ہے۔ ہمارا یقین ہے کہ مسجد، مدرسہ اور محراب کو معاشرے کو نفرت اور تقسیم کا نہیں بلکہ خیر، حکمت، اتحاد اور محبت کا پیغام دینا چاہیے، کیونکہ یہی اسلام کی حقیقی روح اور عصرِ حاضر کی بنیادی ضرورت ہے۔ اللہ تعالیٰ کے فضل و کرم سے نظام المدارس پاکستان نے ملک بھر کے علماء، مدارس، تعلیمی حلقوں اور مختلف قومی اداروں میں نمایاں اعتماد اور پذیرائی حاصل کی ہے۔ نسبتاً مختصر عرصے میں ادارے نے اپنی علمی خدمات، انتظامی اصلاحات، شفاف نظام اور اعتدال پر مبنی تعلیمی فلسفے کے ذریعے ایک ممتاز مقام حاصل کیا ہے۔ یہ اعتماد ایک اعزاز بھی ہے اور ایک بڑی ذمہ داری بھی، جو ہمیں مزید اخلاص، محنت اور لگن کے ساتھ خدمتِ دین کے لیے آگے بڑھنے کا حوصلہ دیتا ہے۔ ہم اللہ تعالیٰ کا شکر بھی ادا کرتے ہیں کہ نظام المدارس پاکستان کو دینی مدارس کے باہمی تعاون اور اجتماعی کوششوں کے پلیٹ فارم متحدہ مدارس کونسل میں مؤثر کردار ادا کرنے کا موقع ملا ہے۔ اس فورم پر نظام المدارس پاکستان کی نمائندگی اس کے ناظمِ اعلیٰ علامہ ڈاکٹر میر محمد آصف اکبر قادری کرتے ہیں۔ یہ ذمہ داری نظام المدارس پاکستان کی علمی سنجیدگی، معتدل فکر اور تعمیری خدمات پر دینی حلقوں کے اعتماد کی عکاس ہے۔ میری دعا ہے کہ اللہ تعالیٰ اس کاوش کو قبول فرمائے، ہمیں اخلاص اور استقامت کے ساتھ دین کی خدمت کی توفیق عطا فرمائے اور نظام المدارس پاکستان کو امتِ مسلمہ اور ہمارے پیارے وطن کے لیے خیر، امن اور اعتدال کا مضبوط مرکز بنائے۔ آمین۔
علامہ مفتی غلام اصغر صدیقی
صدر، نظام المدارس پاکستان
قیادت
دیگر پیغامات
چیئرمین بورڈ آف گورنرز، نظام المدارس پاکستان
پروفیسر ڈاکٹر حسن محی الدین قادری
تعلیم محض معلومات کی منتقلی کا نام نہیں بلکہ یہ کردار سازی، فکری نشوونما اور افر...
ڈپٹی چیئرمین بورڈ آف گورنرز، نظام المدارس پاکستان
خرم نواز گنڈاپور
تعلیم ہر کامیاب معاشرے کی بنیاد ہے۔ جب علم نظم و ضبط، کردار، امن، خدمت اور احساس...
ناظمِ اعلیٰ، نظام المدارس پاکستان
ڈاکٹر میر محمد آصف اکبر قادری
نظام المدارس پاکستان ایک قومی دینی تعلیمی بورڈ ہے جو اسلامی فکری روایت، معیاری ت...
ناظمِ امتحانات، نظام المدارس پاکستان
عین الحق بغدادی
امتحانات کسی بھی نظامِ تعلیم کا ایک اہم ستون ہیں۔ ایک شفاف، منظم اور قابلِ اعتما...